BIBLIOTEKOS

KLAIPĖDOS REGIONO BIBLIOTEKŲ TINKLARAŠTIS

BIBLIOTEKOS

Žemaitiu kalbuos dėktantė Skoudė – naujė veidā

Vasarė 8 dėinuos pavakarė i Skouda rajuona savėvaldībės R. Granauskė bibliuotekas skaitīkla sosėrinka desietks drousiū žemaitiu rašītė jau ontruojė tradėcėnio palėkosė dėktanta. Daugiau kāp posė ėš anū dėktanta rašė pėrma karta. Tarp rašiosiūju vėins prietelios atvažiava net ėš Barstītiu parakvėjės. Devīnis dėktanta dalīvius nuognē padrousėna tas dalīks, ka dešimtāsis anū būrie bova pats Skouda žemaitiu draugėjės pėrmėninks Grušos Juons, katras vėsus draugėjės narius okatėjė aktīvē dalīvautė dėktanta rašīmė.

Gaila, ka ėš bėndra tuos draugėjės nariū skaitliaus tedalīvava mažiau kāp dešimtės pruocėntu, bet ė tas jau bova nemažos žėngsnis i prīšaki. Par dešimti metu gal pavīks vėsėms draugėjės narems paprabavuotė sava ronka parašītė dailē sodieliuotus žemaitėškus žuodius?

Kėta vertos, dėktanta rašiusiu skaitlios gal ėr būtom bovės dėdiesnis, jegu ne Skouda padongie siautiejės begiedis grips. Vėsa laimė, ka ons nesogebiejė pakėrstė Zabitienės Dalės, dėltuo ana nepasėdėdžiava ėr nuognē raiškē padėktava rašontėms dėktanta teksta. Ož kou beleikt anā ėš vėsuos dūšės padiekavuotė.

Untulis Edmunds, tradėcėnė Žemaitiu kalbuos dėktanta somėslītuos, Skaitītuoju aptarnavėma skīriaus vīresniesis bibliuotekėninks

Parašykite komentarą